Kyrios – Iubileo 40 agn

10 agn él passè, da canche al é gnü festejé, avisa ai 16 de novëmber 2003, l’iubileo de 30 agn Kyrios. Te chësta ocajiun él gnü presentè por l’ prüm iade l’liber dla storia di Kyrios y la plata internet www.kyrios-badia.it.

Ai 16 y 17 de novëmber 2013 festejarà i Kyrios l’iubileo de « 40 agn KYRIOS ».

 

Chësc sarà en cürt l’program dla festa:

Sabeda ai 16 de novëmber 2013 dales 20:00 s’abina i Kyrios da sëgn y chi da denant, tla ciasa Jan Batista Runcher a Badia por fà n pü’ de festa en compagnia y alegria.

Domënia ai 17 de novëmber 2013 dales 10:00 S. Mëssa tla dlijia da San Linert, ciantada da düc i componënc atuai di Kyrios y da chi che è n iade stà laprò. (zirca 240 persones).

Dales 12:00 s’abina düc i Kyrios tla Ciasa Jan Batista Runcher a San Linert por marnè düc adüm y fà inant n pü’ de festa. Dales 16.30 vëgnel tignì l’ conzert de iubileo, tres tla ciasa Jan Batista Runcher, cun düc chi che à n iade ciantè y sonè pro i Kyrios.

 

En cürt ciamò la storia de 40 agn Kyrios

I Kyrios é gnüs metüs sö l’ann 1973 da siur Iaco Ploner che ê te chël tëmp caplan a Badia. Kyrios é na parora greca y ô dì: “l’ Signur, nosc pere dl cil”. Chësc grup é nasciü por acompagné mësses, festes de dlijia, nozes y crejimes cun cianties ritmiches religioses te deplö lingac. Dessigü n’él nia stè saurì da portè chësta sort de müjiga tles dlijies dla Val Badia, deache ala n’ê nia ciamò dër conesciüda chilò da nos y i prüms agn é stà plötosc ri por l’grup. Mo por fortüna â i Kyrios la simpatia y l’sostëgn moral y finanziar de gran pert dla jënt. A tröc ti plajô chësta sort de müjiga y insciö ne s’à i Kyrios nia lascè scorajè. Do che siur Iaco é gnü trasferì da Badia a Algund él stè Cristina Crazzolara da San Ciascian che à surantut por n cürt tëmp l’organisaziun di Kyrios. Spo é l’grup gnü portè inant da Adalbert Piccolruaz cina l’ann 2000.

Dal 2000 inant vëgn l’grup Kyrios portè inant da so müt Stefan Piccolruaz y dal dirighënt Andrea Tasser.

Tratan chisc ultims agn, à i Kyrios podü tó sö na secunda registraziun sön CD che é gnüda fora l’ ann 2012. “Les usc deventa üna” é l’titul dl CD che é gnü presentè ai 12, 13 y 14 de lugio 2012 tl salf dles manifestaziuns da La Ila. Avisa dan da 31 agn, tl 1982, à i Kyrios tut sö süa prüma vëta cun l’ inom “Oh munts y vals ladines”. Sön chësta vëta, che é ciamò aldedaincö te val’ciasa, él gnü registré 12 cianties, en gran pert ladines che i Kyrios ciantâ te chi agn.

Cun l’aiüt y la colaboraziun de vignun, é i Kyrios sta bogn de tigní adüm ti bi y ti bur momënc y da portè inant chësta opera cina aldedaincö.

[flickr_set max_num_photos= »12″ id= »72157651667259815″]

Dütes les fotografies