Presentaziun dl CD « LES USC DEVËNTA ÜNA »

Trëi sëres de conzert cun i Kyrios de Badia por la presentaziun de so CD nü. Rapresentaziuns dër garatades, de en grup lié dala pasciun por la müjiga.

Sciöche bel’ince ti agn passà à i Kyrios ai 12, 13 y 14 de messè indô fat en vare sön paladina, chësc iade nia te en conzert sciöche i atri, mo por presenté al publich so CD nü dal titul « Les usc devënta üna ».

Dan da trënt’agn, tl 1982, à i Kyrios tut sö süa ultima vëta. Cun l’tëmp el spo ciamò gnü scrit cianties por i Kyrios che al foss sambëgn jü debojügn de registré. Insciö éle ti ultims agn gnü l’idea da to sö en CD y to ite chisc toc de importanza por la storia dl grup. Tl 2008 à metü man les registraziuns tl stüde « Davide Recordsâ » a Badia. Por chësta ocajiun s’à presenté te stüde passa cincanta ciantarins y musizisc. Le CD tol ite scialdi toc de carater religius por ingleje y sciöche dit ne mancel nia cianties te nosc lingaz ladin scrites aposta por i Kyrios.

Te chëstes trëi sëres de conzerc à i Kyrios portè dant en repertore cun na gran varieté musicala y ince val’toch fora dl CD. Al é gnü soné y ciantè toc a cater usc de artisc conesciüs sciöche por ejëmpl Sting, Michael Jackson, Queen y i.i. Le corú dles löms à contribuì a ti dé ala paladina y a düt le salf na bela atmosfera da stè saurì. In plö ti à val’detail sön paladina, sciöche le dessëgn dl cuertl dl CD ingrandì ia dô i ciantarins y val’coreografia tratan les cianties, dé particolarité ales esibiziuns. La presënza de n publich straordinar y dër numerus ti à scinché al grup ince chësc ann tröpa sodesfaziun y n gran sostëgn. Le resultat é stè le früt de n gran impëgn di mëmbri tratan l’ann sot ala direziun dl dirighënt Andrea Tasser y dl presidënt Stefan Piccolruaz.

Prëibel tolede sö contat cun nos chilò por ciafè plö informaziuns sön le CD.

[flickr_set max_num_photos= »12″ id= »72157651251480438″]

Dütes les fotografies

Chësc proiet à comporté de gran spëises y à ma podü gnì realisé cun l’aiüt dla Provinzia Autonoma de Balsan, dl Comun de Badia, dla Cassa dl Sparagn, dl’Assoziaziun Turistica Badia, y tröc de atri che à te val’manira sostignì le grup te chësc evënt. En giulan i va ince a Benedikt Valentin dl stüde de registraziun « Davide Records » olache al é gnü tut sö l’CD y a André Pizzinini ch’à tut sö les prenotaziuns.