Switch Language

Le cor Kyrios al Bundesjugendsingen 2013

by admin, 21/06/2013

Le cor de jogn dla Val Badia Kyrios à podü tò pert sciöche rapresentanc dla Provinzia de Balsan al « Bundesjugendsingen 2013″ dai 21 ai 24 de jügn a Kufstein/Tirol; ara se trata dl concurs por cors de jogn plü gran dl’Europa, organisé dal’Austria vigni trëi agn te n ater post, a chël che al tol pert vigni ota milesc de mituns y de jogn da düta l’Austria y dal Südtirol. I Kyrios é gnüs invià ala finala a Kufstein sciöche « Gastchor ». A Kufstein é le cor comparì sön palch cun cianties ladines y inglejes, plö avisa pro dui Chorkonzerte, te n supermarcé y pro la festa de contlujiun. Fora de chësc à i jogn dla Val Badia podü tò pert a n Offenes Singen tl zënter dla cité, ala Santa Mëssa tl Passionsspielhaus a Erl y a n conzert dër plajor di grups « Real Group » y « Rajaton » tla « Festung » de Kufstein.

Tan bëgn da n punt d’odüda musical co por ci che reverda le devertimënt y le spirit de grup é chësta gita stada n gran arichimënt y n avenimënt unich che i Kyrios ne se desmentiarà nia tan atira.

I Kyrios oress ringrazié dantadüt la Provinzia de Balsan che à pormetü la partezipaziun al Bundesjugendsingen. N gran dilan por la bela esperiënza che i un podü fà a Kufstein ti va sambëgn ince a nosc dirighënt Andrea Tasser, a nosc presidënt Stefan Piccolruaz y a düt le comité.

No Comments


Please login to comment