Kyrios a Salzburg

I Kyrios à rapresentè Südtirol tl’Austria

Dai 26 ai 30 de jügn 2010 à le grup de jogn Kyrios tut pert sciöche ghest ala incuntada di cors di jogn dl’Austria a Salzburg.

Ai 26 de jügn sunse pià ia da Badia incër les 9 da doman por jì a Salzburg al „Bundesjugendsingen 2010“. Chësta é na manifestaziun che vëgn tignida vigni trëi agn y vëgn organisada dal Bundesministerium. A chësta manifestaziun vëgnel invié düc i cors che stlüj jö i „Wettbewerbe“ a livel regional cun n bun resultat. Chësc ann el stè 79 cors da döta l’Austria che à podü tò pert. I Kyrios à albü l’onur da rapresentè Südtirol, che é gnü invié sciöche ghest por l’ocajiun. Indöt à tut pert a chësc evënt danprò da 2.000 ciantarins jogn, da mituns dla terza tlassa dla scora elementara cina a jogn dles scores altes. Les raprejentaziuns de vigni cor è gnüdes partides sö te deplü dis ia por döt le dé y te salfs desvalîs.

La sabeda domisdé el gnü daurì la manifestaziun cun en conzert tl „Großes Festspielhaus“. Da sëra sunse spo ciamò jüs a ascutè sö n conzert de deplö cors.

La domënia sun jüs ala Santa Mëssa tl dom olà che al é gnü sonè la Krönungsmesse d’W.A.Mozart. Te chësta ocajiun unse ince ciantè düc adüm deplö „Choräle“ d’J.S.Bach. Dô mëssa s’à scialdi tröc ciantarins incuntè tla plaza dla „Alte Residenz“ por ciantè val’ciantia en compagnia y dedô unse ciantè fora por les plazes tl zënter storich.

Le lönesc unse spo tut pert a en concurs da ciantè olà che un portè dant deplö cianties dan da na juria. Danter chëstes n êl düs che é gnüdes scrites por l’ocajiun y che ne cunescion nia. Chëstes unse messè imparè ite te n cürt tëmp. Da sëra unse ascutè sö le conzert „Pop voices“, na serada de cianties interpretades da de vigni sort de cors de jogn.

Le mertesc dales 17.00 el spo stè la gran festa de conclujiun tla Felsenreitschule ulache al à tut pert tröpes autorites. Te chësta ocajiun él stè nü chors che à ciantè por rapresentè i 9 „Bundesländer“. Por Südtirol à i Kyrios portè dant na ciantia ladina, che é gnüda tuta sö bun dal publich. Da sëra él spo ciamò stè na bela festa te tendun.

Te nosc tëmp lëde unse vijitè na mineora dl sè a Bad Dürrenberg olà che na guida s’à spliché sciöche al gnô bele dan da 2.500 agn trat fora le sè dales mineores de pera sot tera. Le sè à portè pro al arichimënt dla cité, y suradöt dles istituziuns clericales. Chëstes mineores é dër lunges y passa le confin dl’Austria cun la Germania. En ater dé domisdé sunse jüs a ciarè la „Festung Hohensalzburg“ – tan co le simbol dla cité de Salzburg – ch’é gnüda lasciada fà sö tl ann 1077 dal prinz Gebhard I. von Helffenstein.

Sanbëgn un ince albü nosta aurela cörta cun matades, karaoke, tröp devertimënt y a gauja de na curëta fasciana ince en nes sanguinënt! Chîsc dis a Salzburg, la „cité dla müjiga“, é sta por düc en arichimënt musical, mo ince na ocajiun por renforzè ciamò deplü le liam di mëmbri te nosc grup.

En rengraziamënt particolar i va a Klaus Nothdurfter, presidënt dl „Amt für Jugendarbeit“ dla Provinzia de Balsan, che à fat a na moda che ala jiss da realisé chësta bela esperiënza. Bel giulan ince ala Silvia Alfreider. A nosc dirighënt Andrea Tasser i va en gran giulan da pert de düc i Kyrios che vëiga tres indô it cun ci impëgn che al se dà  jö cun le cor y sü mëmbri.

Informaziuns plö avisa sön la manifestaziun pon ciafè sön la plata internet http://www1.akzente.net/ .